مسرحية

الجاموســــة اللي بتطيــــــر

الشخصيات : ـ




الجاموسة – العصفور – الثعلب – الدجاجة – الخروف – البطة- – شجرة الصمغ .




الاحداث :ـ




تدور احداث المسرحية حول توصيل مفهوم الفرق بين الحيوانات والطيور والتعرف على الخصائص التى تميز كل منهم عن الأخر والتعرف على بعض المبادئ التى يجب أن يتمتع بها الطفل .




تعالوا بنا نستمتع سويا بأحداث المسرحية …..




تبدا المسرحية عند بيت الجاموسة وهى تطل كالعادة من شباك الحظيرة على صوت صديقتها العصفورة وتدور الاحداث …


الأرضية تملئ بالنشارة والرمل لسلامة الأطفال ..




العصفورة :ـ ( تدق على شباك الجاموسة ) ..


الجاموسة :ـ ميـــــــــن .


العصفورة :ـ صباح الخير يا جاموسة عاملة ايه .. ( ترفرف بجناحيها ..)


الجاموسة :ـ الحمد لله ( تظهر الاسى والحزن وتضع يدها على خدها ) .


العصفورة :ـ مالـــك ياجاموسة زعلانــــــــــه لـــــــــــيه .


الجاموسة :ـ أنا نفسي أطير زيك كده فى الهوا … اشمعنى انت تطيرى وانا لاء.


العصفورة :ـ ايه بتاولى ايه … هاهاهاهاها ..جاموسة عايزة تطير .. الجاموسة اتجننت …الحقوا يا حيوانات الحقوا ياطيور .. الجاموسة هاتطيـــر ..


الجاموسة :ـ انا زعلانه منك ياعصفورة بدل ما تساعديني تتريقى عليا .


فى هذه اللحظة يدخل الثعلب ويتدخل فى الحوار ….


الثعلب :ـ ازيك ياجاموسة أزيك يا عصفورة ..أخباركم ايه ..


العصفورة :ـ هو ينفع ياثعلب جاموسة تطير …زى الطيور


الجاموسة :ـ طيور وحيوانات ايه الفرق يعنى كلهم زى بعض …


الثعلب :ـ بصى ياجاموسة فى فرق بين الحيوانات والطيور عارفة ازاى … اناو وانتى حيوانات والعصفورة طيور .


الجاموسة :ـ يعنى ايه فهمنى اكتر .


الثعلب :ـ ( يوضح الخصائص التى تميز الحيوانات وكذلك الطيور).. الطيور ليها ريش على جسمها وكمان منقار ورجلين اتنين بس وكمان جناحين اما الحيوانات فعلى جسمها شعر وليها اربع ارجل وذيل واسنان وملهاش جناحين ولا ريش ..


الجاموسة :ـ ماليش دعوة انا عايزة اطيـــــــر زى العصفورة .


(الثعلب والعصفورة يتهامسان الحديث جانبا ثم ينطلقوا قائلين )


العصفورة :ـ خلاص يا جاموسة احنا هانسعدك علشان تطيرى ..


الجاموسة :ـ فرحانة هيه هيه هيه وتنط وتعلو عاليا هيه هيه .


انا هاطير زى العصافير .


تدخل الجاموسة فى الحظيرة …



المشهد الثانى …


يبدا المشهد بجميع الحيوانات والطيور كل منهم فى بيته ويزورهم كل من الثلعب والعصفورة باحثين عن الريش لصنع الجناحين ..




الثعلب والعصفورة :ـ افتحى يا فرخة . يدق الباب


الفرخة :ـ تقلد صوت الفرخة وتقول مين وعايزين ايه ..


الثعلب :ـ انا الثعلب وانا العصفورة ممكن تدينا شوية ريش علشان نعمل جناحين علشان الجاموسة تطير ..ممكن


الفرخة :ـ هاهاهاها الجاموسة عايزه تطير ..هو فى جاموسة بتطير .. على العموم خدو شوية ريش


يدق الباب على الخروف


افتح يا خروف انا الثعلب وانا العصفورة افتح ..


الخروف :ـ يقلد صوت الخروف خير عايزين ايه .


العصفورة :ـ ممكن تدينا شوية ريش نعمل للجاموسة جناحين .


الخروف :ـ هاهاهاها ازاى وانا حيوان زيها ومعنديش ريش بس هوفى جاموسة بتطير .


يدق الباب على البطة


افتحى بابطة انا الثعلب وانا البطة افتحى


البطة :ـ تقلد صوت البطة ميـــن اتفضلوا …


الثعلب :ـ ممكن تدينا شوية ريش علشا نعمل جناحين علشان الجاموسة تطير ..


البطة :ـ تطير .. هى مين دى اللى تطير معقولة انا عمرى ماشفت جاموسة بتطير دى اكيد مجنونه وهاتقع تتكسر احنا لازم نشوفها وهى بتطير ..




يجمع الثعلب والعصفورة الريش فى سلة ثم يبداو فى عمل الجناح وتقول الثعلب


الثعلب :ـ احنا ناقصنا صمغ علشان نلزق بيه الريش تعالى نجيبة من عند شجرة الصمغ .


العصفورة :ـ يا شجرة الصمغ ياشجرة الصمغ ممكن تدينا شوية ريش علشان نعمل جناحين وتطير الجاموسة .


شجرة الصمغ تسغرب وتضحك وتقول


شجرة الصمغ :، اللى يعيش ياما يشوف جاموسة هاتركب جناحين وتطير


خدوا الصمغ بس اوعوا تنسوا خليها تيجى تطير من عندى علشان اتفرج عليها .. اوعوا تنسوا ..

المشهد الثالث


يخرج الجميع وتدخلوا جميعا والجاموسة ترتدى الجناحين فى ذراعها وتستعد للطيران وتطلب من الجميع التصقيف بصوت عالى فيصفق الجمهور وتطير الجاموسة وتفقز من مكان عالى هوب ياخبر ايه اللى حصل ايه اللى جرا .


الجاموسة بعد طارت فى العالى وقعت جامد تصرخ الجاموسة وتبكى اىاىاىاى اه اه اه حرمت والله حرمت انا عمرى ماهقول اطير تانى الطيور تطير والحيوان تمشى على الارض سبحان الله انا دلوقتى عرفت الفرق بين الحيوانات والطيور…